يوميات زوجة و زوج

بناءا على طلب الدحنون ,, قررت اني اكتب هالقصة المأخوذة من قصة روسية ,,

المهم ..

الحكاية عن زوجين متعودين يكتبوا مذكراتهم اليومية يوم بيوم ..

نبدأ مع اللي كتبته الزوجة ,,


يوم السبت ,,

بلشت يومي الساعة 8 الصبح قمت اعمل الفطور و حضرت بيض مقلي و جبنة و بعتت احمد يشتري
صحن حمص بنص دينار و بـ 35 قرش فلافل و بعد نص ساعة اجا احمد و معاه الحمص و الفلافل ,,
اخدت حبة فلافل و اكلتها و كان الفلافل زاكي بس عليه شوية ملح زياد ,, المرة الجاي راح اوصي احمد
انه يحكي للبياع ما يحط ملح زيادة ,, كانوا الولاد نايمين و ابوهم كان مصحصح شوي .. صحي على صوت
رنة التلفون لانه سلفتي حكت معاي عالتلفون عشان كانوا رايحيين يوم الجمعة يحضروا عرس بنت عمها
على شب بشتغل بشركة كمبيوترات حكتلي الاسم بس نسيت و حكتلي كمان انه فستان العرس تبع بنت
عمها كان مش بزيادة مع انهم شارينه غالي تقريبا دافعين حقه 600 دينار .. حكتلي كمان انه مرة عمها
كانت لابسة صاية شاريتها من جبل الحسين بـ 125 دينار .. ........ بعد ما خلصت مع سلفتي رحت
صحيت الولاد عشان يفطروا فقاموا كلهم الا زيد الصغير كان ابصر شو ماله معاه سخونه .. فقررت
اني اوخده عالدكتور بعد ما يخلصوا الولاد فطور و يطلع ابوهم عالشغل .. رحت عالدكتور عالساعة
11:30 و كان في ازمة عند الدكتور و كان في مرة بتستنى الدكتور و معاها ابنها يا حرام لوزو نازلات
.. دخلت عالدكتور و حكالي انه زيد ما فيه اشي الحمدلله .. بس الحراراة اللي معاه لانه امبارح كان يلعب
بالحارة و شارب مية وسخة .. مع اني حكيتله انه ما يشرب من بره مية ,, لانه عنا كولر مية و مشتركين
بشركة توصيل المياه و كل شهر بندفع 30 دينار عشان يجيبولنا كل يوم قارورة مية صحة .. بعد ما
خلصت من عند الدكتور رحت اشتري طقم فناجين قهوة لانه الطقم اللي بنستخدمه احمد كسر 3 صحون
و محمد جوزي كان كاسر فنجانين .. فقررت انه اشتري واحد جديد لحتى نستخدمه بالبيت مع انه عند 3 طقوم
فنجاين قهوة جداد بعدهم بالكرتونة بس بستخدمهم اذا اجا عنا ضيوف .. شوفت بالمحل اكثر من طقم اعجبني
فاحترت .. حكيت مع امي اتطمن عليها و اسالها شو اللون الحلو اللي بقدر اشتريه .. حكتلي اشتري الاسود
لانه ما ببين عليه الوسخ .. قررت اشتري الاسود .. رجعت عالبيت الساعة 5:30 عشان الحق المسلسل التركي
اللي بيجي على mbc الساعة 6 .. كانت الحلقة اعادة لحلقة امبارح .. حضرتها لانه الولاد ما خلوني اعرف
احضر حلقة امبارح .. اجى محمد من الشغل الساعة 9:30 .. كان محمد مش طبيعي .. وجه اصفر و مبين
عليه انه قلقان من شغلة .. سالته مالك .. حكالي ما في اشي .. و قعد على التلفزيون و ما بحكي مع حدا ,, رجعت
سألته مالك .. في اشي .. من شو قلقان .. رد علي ببرود بانه ما في اشي الحمدلله .. بس شوي مش حاب يحكي ..
حطيت العشا .. و كان بايت من طبخة يوم الجمعة .. و طبختلهم جنب المقللوبة البايتة شوية بامية كنت مفرزها
بالثلاجة .. كانت البامية كثير زاكية .. لانه الولاد اكلوا الباميات و ما لمسوا المقلوبة .. بس حتى بالعشا كان محمد
ما بحكي كعادته و ضلوا ساكت .. بعد العشا رحت اجلي و محمد كان يحضر الاخبار .. صارت الساعة 11:30 خلصت
شغل البيت و رحت على غرفة النوم لحتى انام و محمد لحقني بعد 10 دقايق بعد ما خلصت الاخبار .. و كان محمد
برضه ساكت و ما بحكي .. سالته محمد احكيلي مالك .. حكالي والله ما في اشي .. و نام .. انا ضليتني صاحية بفكر
ماله محمد .. و بلشت اشك انه بفكر ببنت تانية .. ما بعرف شو اعمل .. بس قررت اني احكي مع امي بكرة الصبح
لحتى اسالها شو اعمل و جوزي بعرف بنت تانية و دايما سرحان فيها .....



يوميات الزوج لنفس اليوم ..


الحمدلله رب العالمين .. على مستوى الشغل كان يوم ممتاز .. بس الوحدات خسر الدوري فانصدمت من
الخسارة .. بس رغم كل هاد الحمدلله اكلنا بامية زاكية اليوم من مرتي حبيبتي ..

اختصرووووووووووووووووووووووا مشان الله